Nie wiym, czy mi sie udo namówić łojców miasta do postawiynio tych dziesiyńć muzeów, bo jak nimieli grosza na kupiyni autobusowego dworca, to tym tuplym nie bydóm wydziwiać s inkszymi wiecami. Bez roboty by to mieli, jakby sie im udało łopucować banhof na Kolejowej i tam chocioż rozcióngnóć tepichy, coby sie ludzie nie zmazali, jakby prziszli łobezdrzić, jako to kiejsi sie bilety przedowało.
Znaszło by sie eszcze pore takich pochyniónch fabryk, w kierych Cieszyniocy mieli kiejsi robote, a dzisio jyno tam wiater śmieci rozganio, abo przedujóm tam jakisi stare, wyświechtane galaty, jakle, abo insze szaty. Popisane też je wszecko, kaj sie jyno do w tej śmiysznej czeski rzeczy i potym człowiek nie wiy, kaj je, czy eszcze w Cieszynie, czy uż na Zaolziu.
Dejmy na to w tej kiejsi pieknej drukarni dowiymy sie, że przedujóm tam "slevy", "zbożi", a "nabytek", a do tego eszcze wymiynióm wóm całom łoblyczke, kieróm żeście kupili na wiosne, na zimowe jakle i mantle.
Kónszczek dalij je ta staro eszcze przedwojynno drukarnia, kierej też żodyn nie darowoł i powylepioł na ni co sie jyno dało. Nóndymy tam jakisikej kancnaryje, kościół nieznómej mi wiary, a ku tymu ogłoszyni, kómu mogymy zaniyś plastikowe szpunty do zakryncanio. Jakby tego chybiało, to eszcze mogymy se tam przeszyć galaty, jak nóm przibyło brzucha, a ku tymu nauczóm nas jeździć na aucie, kiere mómy se zamiar kupić. Zaś za winklym namowiajóm nas, coby se nónś swoji miejsce na ziymi i sie uż nie szolóntać po Cieszynie, bo i tak nie nóndziecie tu żodnej roboty.
A teraz zaś fajny wic:
- Milaczku mój - prawi baba do swojigo chłopa.
- Przed wiesielim toś mi kupowoł rozmajte piekne rzeczy, a teraz uż ani kwiotka mi nie kupisz!
- A widziałaś ty, coby wynkorz kormił rybe, jak uż jóm chyci?
Mjyjcie sie wszedcy dobrze i wiesiołego popióntku.
*Śtowarzyszenie Ślązaków legalne. Sąd uznał narodowość śląską? CZYTAJ TUTAJ
*Gwarki 2012, czyli bez pochodu nie ma zabawy ZOBACZ ZDJĘCIA
*KONKURS MŁODA PARA: Przyślij zdjęcia, zgarnij nagrody!
Dołącz do nas na Facebooku!
Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!
Dołącz do nas na X!
Codziennie informujemy o ciekawostkach i aktualnych wydarzeniach.
Kontakt z redakcją
Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?