Ruch niy chcioł zagrać pod Górnika, tōż zrobiōł to Piast. Bilans pojedynkōw ślōnsko-warszawskich z tego tydnia jes jednak dō nos i tak niykorzystny. Mōgło być jednak gorzij. Po rymisie w Gliwicach to gospodorze majōm wiyncyj uciechy, dyć poradziyli ōni wyrwać faworytowi punkt na krōtko chwila przed ostatnim gwizdkiym 14. kolejki.
Szpil od poczōntku żodnego niy porywoł. Kibicōm doprowdy mōgło sie lekko mierznōnć. Gorko zrobiyło sie dopiyro w ostatnich minutach, ale po kolei...
O piyrszej połowie nojwiyncyj godo nōm statystyka cylnych szlagōw. Jakby jōm niy pododować, przemnożyć, spotyngować czy nawet sieknōnć silnia i pierwiastek kōnta alfa sztyjc wyndzie nōm zero.
Poczōntek drugij połowy zapowiadoł za to lepsze widowisko. Już dwie minuty po przerwie gości na 1:0 wykludzo Dwaliszwili. Po cyntrze Pazia i zgraniu Brzyskigo, niydowachowany gruziński snajper klupnōł tak, że ani Trela ni mōg uratować Piasta.
Dziynki tej bramce szpil sie w kōńcu trocha rozfechtowoł. Obie ekipy postawiyły na ofynsywa, ale rychtyk dobrych okazji podbramkowych dalij wiela niy było. Spotkani mo sie już ku kōńcowi, kej Polonia dostowo piyrsze ostrzeżyni, że niykōniecznie musi wywiyź ze Ślōnska 3 punkty. W 87. minucie Przyrowski z biydōm interwyniuje po fest mocnym szlagu Podgórskigo. Za chwila torman Polonii ni mo już tela szczynścio. Po akcji i cyntrze z lewego skrzidła, bal trefio do durś niywachowanego Rubena Jurado, kiery z bliska wyrownuje. Mōmy 1:1 na jakiś dwie minuty i pora sekund przed kōńcym regulaminowego czasu gry.
Tera dopiyro robi sie rychtyk ciekawie. Dyć bez haji ni ma porzōndnego meczu. W 91. minucie za szpetny faul z boiska furgnie obrōńca gości, Adam Kokoszka. Fusbaliści przi okazji zebrali sie w kupie coby dać se po szlagu, a raczyj trocha sie podugać. Dużo do godki mioł przi tymu tyż tryner Piasta, kiery hneda zostoł posłany na trybuny.
Po czystkach wynik już sie niy zmiyniōł. Piast niy pozwolōł Polonii wskoczyć na drugi plac, a sōm utrzimoł sie w środku ekstraklasowej tabeli.
Grzegorz Buchalik
www.silesiansport.pl
CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL
*NiesamowityDreamliner w Pyrzowicach ZOBACZ ZDJĘCIA i WIDEO
*Zniewalający wystrój restauracji Kryształowa Magdy Gessler ZOBACZ ZDJĘCIA i WIDEO
*HC GKS Katowice od szatni ZOBACZ ZDJĘCIA TYLKO W DZ
*Ślązacyzazdroszczą Katalończykom autonomii: prawda czy fałsz? [CZYTAJ I SKOMENTUJ]
Dołącz do nas na Facebooku!
Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!
Dołącz do nas na X!
Codziennie informujemy o ciekawostkach i aktualnych wydarzeniach.
Kontakt z redakcją
Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?