Nasza Loteria SR - pasek na kartach artykułów

Buchalik w blogu Ślonski fusbal: Arek Milik może już pomału pakować swoji szczewiki

Ślonski fusbal
Arkadiusz Milik
Arkadiusz Milik Dariusz Hermiersz/www.gornikzabrze,pl
Grzegorz Buchalik pisze blog po śląsku o śląskiej piłce nożnej. CZYTAJ KONIECZNIE I SKOMENTUJ

Plac czworty, siōdmy, czternosty i piytnosty tamek pokōńczyły jesiyń kluby z ślōnskigo. Nojwiyncyj uciechy doł nōm Górnik, szpetnie zaskoczōł wicemistrz Polski Ruch. Darymno jesiyń zaliczyło tyż Podbeskidzie, bardzij zadowolyni bydōm za to kibice w Gliwicach.

Ciynżko pedzieć co prziniesie wiosna, tym bardzij, że pierōn wiy jak w składach ślōnskich ekip zafyrlo zimowe okinyko transferowe. Już stracilimy nowego Bayeroka Milika. Czy ze Ślōnska wyfurgnōm tyż Nakoulma i Skorupski? A mono Piech i Jankowski? Czy kieroś z naszych ekip do se pokój z szporowaniym i zamiast yno sprzedować groczy, poradzi skludzić do sia jakigoś chopa, kiery rychtyk umi kopnōnć do bala?

Zejrzymy na chwila co kōmbinujōm w Chorzowie i Zabrzu...

Transfery

Polityka transferowo polskich klubōw nikiedy ciynżko jes zrozumieć. Styknie yno spōmnieć taki postaci jak Józef Wojciechowski, czy Antoni Ptak. Oba biznesmyny, kierzi durś ni majōm pojyncio o fusbalu, zachowywali sie w swoich klubach jak paniczki na zakupach. Chcieli zaroski zbudować klub-potynga. Wojciechowski skludzoł do Warszawy rozmańtych gwiazdorōw i sztyjc zmiynioł trynerōw (bezmała za jego panowanio było ich tam 17.), Ptak mioł za to ptoka na punkcie Brazylijczykōw i przitargoł ich do Szczecina cołko drużyna. Żodyn z tych panōw wielkij kariery we fusbalu niy zrobiōł, oba narobiyli yno darymnego miszōngu...

Niy chca samek w żodnym wypadku porównywać obecnych prezesōw ślōnskich klubōw do wyżyj wymiyniōnych dziołaczy. Takich atrakcji prezesy ślōnskich klubōw nōm niy powinni zafundować. W składach naszych ekip jednak na pewno sie zafyrlo. Bele yno to im za fest niy zaszkodziyło.

W piōntkowym szpilu z Reprezyntacji Polski z Macedōniōm po boisku tyrało trzech fusbalistōw z ślōnskich klubōw: Łukasz Skorupski, Arkadiusz Milik (oba z Górnika) i Arkadiusz Piech (Ruch). Wiela z nich zostanie na Ślōnsku na wiosna?

Milik z Macedōniōm klupnōł swojigo piyrszego gola w kadrze. Zaprezyntowoł sie dobrze i po szpilu pofurgnōł już prosto do Leverkusen na badania medyczne w klubie wicelidera Bundesligi. Piech w piōntkowym sparingu niy dostoł tak dobrej szansy na pokozani sie jak jego imiynnik. Groł yno bez 15 minut i wiela niy zdōnżōł zdziałać. Skorupski tyż za fest sie niy wykozoł. Jako torman za dużo roboty w tym spotkaniu ni mioł. Na tych dwóch jednak od jakigoś czasu tyż już dziwajōm sie inksze kluby.

Bez nojbliższe pora tydni my bydymy beztōż bardzij sie dziwać na to jak spisujōm sie niy fusbaliści, a właśnie prezesy naszych klubōw. Szczególnie trza dać pozōr co wykōmbinujōm w Zabrzu i w Chorzowie...

Górnik traci snajpera

Kibicōm Górnika na pewno ni ma gańba za postawa swojij ekipy w rundzie jesiynnej. Synki z Zabrzo niy roz pokozali nōm, że do sie grać we fusbal gryfnie, skutecznie i mieć jeszcze przi tymu uciecha. Nasi w lidze przegrali yno roz, a dziynnikorze zgodnie godali, że to ōni grajōm nojpiykniejszy fusbal i bez godki zasługujōm na miano ,,rewelacji jesiyni". Mało, kiery w to wierzōł, ale Górnik na wiosna doprowdy bydzie mōg powalczyć niy yno o europejski puchary, ale nawet o swoji 15. mistrzostwo Polski. Chyba, że sprzedajōm cołko drużyna...

Narazie pewne jes, że Górnik straciōł swojigo młodego snajpera. Arek Milik może już pomału pakować swoji szczewiki i lōnty i kludzić sie nad Ren. Bayer Leverkusen ciepnōł piniōndzami, a niy były to jakiś trzeszczoki. Ponoć 2,6 mln euro popłynyło już na Ślōnsk. Prezes Jankowski prziznoł, że trza było sprzedać Milika skuli problymōw finansowych. Pedzioł tyż jednak, że reszta fusbalistōw chciołby zatrzimać. Skuli tego transfery Skorupskigo i Nakoulmy, kiery już praje pożegnoł sie z kibicami sōm coroz mynij prawdopodobne.

Werciłoby sie dalij niy rozłōnaczać składu. Wierzymy, że prezes Jankowski darymnie niy fandzoli gupot, a rychtyk postaro sie utrzimać reszta groczy i pōmōże im dobrze prziszykować sie na wiosna.

Ruch zaś zrobi wyprzedaż?

W Chorzowie jesiyń pokulała sie durś inaczyj. Ruch w przeciwiyństwie do swoich sōmsiodōw z Zabrzo spisoł sie gorzij niż sie zapowiadało jeszcze bez lato. Na dyć 15. plac w tabeli to trocha mało jak na wicemistrza Polski, kiery na wiosna bōł fest blisko zdobycio 15. korōny. Problymy zaczyły sie jak robotōm w klubie ciepnōł Waldemar Fornalik. Przody zdało sie, że w klubie przejyntym przez jego brata wiela sie niy zmiyni. Prowda okozała sie inkszo. Ruch przegrywoł wszyjski szpile ligowe i nowy tryner hneda zostoł wyciepany. Na jego plac prziszoł Jacek Zieliński, ale ōn tyż cudōw niy zdziałoł. Niebiescy trzimiōm sie nad strefōm spadkowōm.

Bez ostatni lata Ruch bōł zagadkōm i przikładym jak idzie sztyjc sprzedować groczy z podstawowego skład, bez szkody do drużyny. Klub sprzedowoł, bo musioł szporować, ale synki z Chorzowa dycki trzimali sie doś wysoko w tabeli i grali doprowdy fajnie. Waldi Fornalik poradziōł poskłodać dobro, zgrano ekipa. Tera jego już ni ma. Klub gro gorzij, a fest możliwe jes, że Ruch sprzedo nastympnych groczy.

Piech-Jankowski to pora, kierej w tamtym sezōnie lynkała sie niy jedna defynsywa. Takōm dwójkōm Ruch już może jednak niy zagrać. Mono odyndzie jedyn ś nich, a mono nawet oba...

Bardzij prawdopodobny zdo sie transfer Piecha, kierymu za pōł roku kōńczy sie kōntrakt i kiery już od jakigoś czasu ofyn godoł, że może odynś z klubu. Ostatnio kupiyniym go zainteresowoł sie ponoć Lech Poznań, ale Ruch wolołby niy oddować swojigo grocza kōnkuryncji.

Co do Jankowskigo godało sie, że mo iś do Wisły, ale w Chorzowie pedzieli, że ni ma o czymś takim w ogóle godki. Fusbalista podpisoł niydowno nowy kōntrakt z klubym do czyrwca 2014. W tym samym źródle (,,Fakt") czytōmy tyż o odynściu Perdijicia i Lisowskigo, ale tych informacji na razie chyba niy wypado traktować poważnie.

W Chorzowie chyba sōm świadōmi, że klub tera raczyj trza wzmocnić niż osłabić, beztōż gupot niy powinni tyż robić. Bydymy widzieć jak sprawy dalij sie pokulajōm.

*W nojbliższym czasie teksty na blogu Ślōnski Fusbal niy bydōm pokozywać sie tak czynsto. Co jakiś czos jednak sie coś szkryfnie, a od wiosny wrōcymy nazot do trybu podsumowań kolejek kożdego tydnia (sezōn ekstraklasowy zaczyno sie już w lutym). Teroski chciołbych powinszować wszyjskim czytelnikōm wesołych świōnt Pōnbōczkowego Narodzynio i godōm: ,,Do zaś". Paczcie tam jako!

Dołącz do nas na Facebooku!

Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!

Polub nas na Facebooku!

Dołącz do nas na X!

Codziennie informujemy o ciekawostkach i aktualnych wydarzeniach.

Obserwuj nas na X!

Kontakt z redakcją

Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?

Napisz do nas!

Materiał oryginalny: Buchalik w blogu Ślonski fusbal: Arek Milik może już pomału pakować swoji szczewiki - Dziennik Zachodni