Nasza Loteria SR - pasek na kartach artykułów

Buchalik: Legia Warszawa - Górnik Zabrze 3:0. Porażka, kiero boli nojbardzij

Ślonski fusbal
Górnik zaliczo trzecio porażka z rzyndu i to nojgorszo ze wszyjskich, bo z Legiom. 3:0 w pleca po golach Saganowskigo, Ljuboji i Dwaliszwiligo. Szpetnie to wyglondo...

Nastympny tydziyń i nastympny szagier z udziałym Górnika. Szpile z Legiom to taki polski Gran Derbi. Poziom mono niy tyn som, ale emocje na liniach Katalonia-Madryt i Ślonsk-Warszawa zdowajom sie być analogiczne. Dwie ostatni porażki Górnika mogły być wartko zapomniane. Stykło yno wklupać Legii...

Piyrsze minuty szpilu to wyrownano wartko gra. Wylotani grocze obu ekip tyrali to pod jednom, to pod drugom bramkom. Piyrszy groźny szlag na bramka Górnika poszoł w 7. minucie. Zgrywo Saganowski, szczylo Łukasik, a elegancko na rog wybijo Skorupski.
Synki z Zabrzo mogli odpedzieć w 21. minucie. Na prawym skrzidle fajnie pogrywo Olkowski z Łuczakiym. Tyn drugi zaroski ślatuje do środka i zagrywo mocny bal po zolu wzdłuż bramki. Żodyn jednak niy poradzi przecionć tego zagranio. Jeszcze niy koniec! Bal opanowany po drugij stronie bramki zaś wraco do środka kaj piyntom próbuje szczynścio Zahorski. Defynsywa jednak dowo se rady.

Hneda jeszcze lepszo okazjo mo Legia. Ljuboja wartko zagrywo z wolnego. W szesnostku Radović zgrywo do niywachowanego Saganowskigo. Tymu jednak momyntalnie pod szłapy lygo Skorupski. Szwarno parada.

W 33. minucie już niy bydzie happy end’u. Kosecki kludzi bal ze szkidła na środek, kaj z wele 20. metra oddowo piykny szlag pod prawy słupek. Zaś dobrze ciepie sie Skorupski. Niystety do bala piyrszy dolatuje Radović. Momy zgrani do środka, kaj formalności dopełnio Sagan. 1:0. Do przerwy już bez zmian, chocioż prób po obu stronach niy brakowało.

W drugij połowie Górnik bardzij przicis gospodorzy. Nasi czynścij znojdowali sie pod bramkom gospodorzy. Niy widzielimy jednak żodnego porzondnego szlagu. Pora okazji jednak było. Roz po dobrej ,,klepie" na som na som wyloz Zahorski, ale syndzia odgwizdoł spolony. Inkszym razym do bala przeciepanego za obrona dobrze sztartnoł Łuczak. Stykło trocha szmyrnonć futbolowka, ale brakło cyntymetrow. Napastnik Górnika yno szczasnoł sie z bramkorzym.

Hneda sytuacjo Górnika stanie sie pieronym ciynżko. W 67. minucie po długim wykopie Kuciaka bal przed bramkom gości głowom zgrywo Saganowski, a za chwila z ostrego konta po długim rogu klupie Ljuboja. Skorupski ni mo samek wiela do godki i jes 2:0.
Górnik traci brama i Nawałka zaroski robi dwie zmiany. Na placu gry oglondomy Bonina i Nakoulmy. 15 minut przed końcym szpilu wlezie tyż Jeleń. To wszyjsko chyba już jednak za niyskoro. Legia mondrze sie broni, a Górnik sztyjc ni mo pomysłu w ofynsywie.
W ostatnich minutach odkryto ekipa z Zabrzo naraziyła sie jeszcze pora razy na groźne kontry. Przody w dobrej sytuacji znod sie Radović. Po jego szlagu i obronie Skorupskigo zrobioł sie tak miszong, że bez chwila wszyjscy szukali bala. Defynsywa tym razym jeszcze wygrywo. Hneda zaś sie zamloło tak, że bal z bramki musioł wybijać Szeweluchin i Legia mo rog. Po krotkim jego rozegraniu bal dostowo Dwaliszwili, kiery przedziyro sie ś nim przez obrona choby Sakaszwili ,,Rudym". Jes szlag i jes gol numer 3.

Tak to niy miało wyglondać. Bez cołko jesiyń Górnik przegroł yno roz, a teroski na wiosna dostowo już po roz trzeci. Ta drużyna mo potyncjał i musi sie wartko spamiyntać, bo sztyjc jes w grze o puchary, a mono nawet ,,majstra".

Legia Warszawa - Górnik Zabrze 3:0 (1:0) 
Bramy: Marek Saganowski (33. min.), Danijel Ljuboja (67 min.), Wladimer Dwaliszwili (90.+2. min.).
Legia: Dusan Kuciak - Bartosz Bereszyński, Inaki Astiz, Artur Jędrzejczyk, Jakub Wawrzyniak - Jakub Kosecki, Daniel Łukasik, Ivica Vrdoljak (68. min. - Dominik Furman), Miroslav Radovic - Danijel Ljuboja (73. min. - Tomasz Brzyski), Marek Saganowski (86. min. - Władimir Dwaliszwili).
Górnik: Łukasz Skorupski - Paweł Olkowski, Adam Danch, Ołeksandr Szeweluchin, Seweryn Gancarczyk - Krzysztof Mączyński, Bartosz Iwan (68. min. - Prejuce Nakoulma), Aleksander Kwiek, Mariusz Przybylski, Tomasz Zahorski (68. min. - Grzegorz Bonin) - Wojciech Łuczak (75. min. - Ireneusz Jeleń).

Dołącz do nas na Facebooku!

Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!

Polub nas na Facebooku!

Dołącz do nas na X!

Codziennie informujemy o ciekawostkach i aktualnych wydarzeniach.

Obserwuj nas na X!

Kontakt z redakcją

Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?

Napisz do nas!

Materiał oryginalny: Buchalik: Legia Warszawa - Górnik Zabrze 3:0. Porażka, kiero boli nojbardzij - Dziennik Zachodni