Buchalik: Kości szczyrkajom, krew pyrsko na Piaście

Obie ekipy rozfechtowane po ostatnich pewnych zwyciynstwach grały w tym szpilu yno o 3 punkty i to widać było praje od piyrszego gwizdka. Tym bardzij potwierdzōm nōm to pomeczowe statystyki. Żodyn samek nogi, ani nawet głowy ni mioł zamiaru odstawiać...

CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL

Zdo sie jednak, że w szpil lepij wleźli fusbaliści Piasta. Już w piyrszych minutach pora razy mōgli otworzyć wynik spotkanio. Pod bramkōm Słowika nieźle zafyrloł czesko-słowacki duet... piastowski. Nojprzōd dobrej okazji niy wykorzystoł Dočekal, a niyskorzij szlag z dystansu Cicmana wylōndowoł na słupku.

Słowak piyrsze skrzipki zagro jeszcze w bramkowej akcji z 30. minuty. Oglōndōmy gryfno, wartko kōntra gospodorzy. Długi bal przeciepany na prawe skrzidło opanowuje właśnie Cicman, kiery za chwila zrobi se durś za błozna obrōńcy Jagi i dogro po zolu do środka. Tamek szlagiym akcjo wykańczo Lazdins. Bez cufal bal odbijo sie jeszcze od obrōńcy i durś zaskakuje tormana. 1:0.

Hneda jednak doczkōmy sie skutycznej odpowiedzi gości. W 38. minucie lewōm strōnōm elegancko przedziyro sie Kupisz. Mōmy dograni kaś na wysokość jedynostego metra. Tamek technicznym kopniynciym akcjo kōńczy Frankowski, kiery jak zawsze stoi tam kaj mo stoć i to jakimś cudym durś niywachowany. Bal po kōntakcie ze słupkiym lōnduje w siatce Treli. Jes to 167. gol Franka w Ekstraklasie. Podług nojświyższych ustalyń sztyjc jednak brakuje mu jednego trefiynia do wyrownanio wyniku Chorzowioka, Gerarda Cieślika.

W drugij czynści szpilu zrobiyło sie ciekawie, ale raczyj niy skuli dobrych akcji, yno raczyj pojedynkōw w stylu MMA. Piyrszym, kiery furgnōł z boiska bōł Dariusz Trela, kiery obejrzoł czerwōno kartka w 64. minucie po tym jak ewidyntnie zahoczōł nogōm przeciwnika zaroski za liniōm szesnostego metra.

Piast zostoł teroski zawarty na swojij połowie, ale przetrzimoł ataki gości aż do wyrownanio siył w 81. minucie. W szesnostce gości, na sōm na sōm wyłazi wtedy Podgórski, ale rowno z zolym wycino go Modelski. ,,Kosa" nabrōszōno, choby na żniwa! Elwer bez godki. Do bala ustawiōnego na wopnie przimierzo sie Marcin Robak. Nowy grocz Piasta, niystety durś zfifro ta okazjo. Piyrszy szlag brōni Słowik, a po dobitce bal furgnie już prosto w kosmos.

Niydosyt kibicōw przi Okrzei bydzie pierōnowy. Piast mōg jeszcze klupnōnć na 2:1 w 90. minucie. Bal na prawym skrzidle dostoł Zbozień, kiery mioł tyż wtedy ,,hektary" wolnego placu. Niystety niy poradziōł tego dobrze wykorzystać. Po jego szlagu bal pofurgnōł lekko nad latōm.

Synki z Gliwic po czwortym szpilu bez porażki znodli sie na 6. placu w tabeli. Tamek tyż zostanōm przinajmij do Śmiergustu, po kierym mogōm ,,spłynōnć" jedna lokata niżyj w przipadku wygranej Lechii z Wisłōm.

PODOBA CI SIĘ BLOG GRZEGORZA BUCHALIKA? NAPISZ KOMENTARZ

Grzegorz Buchalik, student z Żor, uwielbia grać w piłkę i relacjonuje po śląsku mecze ekstraklasy. Ślōnski fusbal ma udowadniać, że język śląski to nie tylko żarty, co nie znaczy, że żartów musimy usilnie unikać. Ślōnski fusbal ma przede wszystkim promować śląski język i sport. Teksty adresowane są nie tylko do Ślązaków, dla których godka jest językiem ojczystym, wyniesionym z domu. Grzegorz Buchalik pisze alfabetem łacińskim z tym, że dodaje jedną literę-samogłoskę, zapisywaną jako: ō (jak np. w wyrazach kōnsek", czy pozōr).

Piast Gliwice - Jagiellonia Białystok 1:1 (1:1)
Bramy: Artis Lazdins (30.) - Tomasz Frankowski (38.)
Czerwōne kartki: Dariusz Trela (64.) - Filip Modelski (81.)
Piast: Dariusz Trela - Damian Zbozień, Adrian Klepczyński, Jan Polak, Paweł Oleksy - Pavol Cicman, Mateusz Matras, Ruben Jurado (66. Jakub Szmatuła), Artis Lazdins (80. Mariusz Zganiacz), Tomasz Podgórski - Tomáš Dočekal (62. Marcin Robak).
Jagiellonia: Jakub Słowik - Filip Modelski, Adam Dźwigała, Michał Pazdan, Alexis Norambuena (32. Lubos Hanzel) - Tomasz Kupisz, Maciej Gajos, Min Kyun Kim (59. Euzebiusz Smolarek), Rafał Grzyb, Daniel Quintana - Tomasz Frankowski (86. Tomasz Bandrowski).

*Strajk generalny 26 marca w woj. śląskim
*Bandycki napad na sklep w Mysłowicach ZOBACZ WIDEO
*ZOBACZ luksusowe samochody prezydentów miast. Po co im to? ZOBACZ ZDJĘCIA
*Serial Anna German [STRESZCZENIA ODCINKÓW]