Wielki Derby Ślōnska to szpil z zorty ,,fest ultra pierōnowo ważnych", czego niy trza fusbalistōm ekstra tłumaczyć. Jednak jak podziwać sie na statystyki z spotkanio z marca 2008 roku, to ofyn wypado prziznać, że tym razym derby jednak zaś taki Wielki niy były. W pamiyntnym szpilu na Stadiōnie Ślōnskim Ruch wygroł 3:2 na co zaglōndało aż 41 000 kibicōw. Teroski na liftingowany obiekt Górnika mōgło ich wlyź yno 3000.
CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL
Dōmy se tym razym pokój z spōminaniym długij, dobrze znanej listy zdobytych bez oba kluby tytułōw, korōn, pucharōw i prziwoływaniym reszty statystyk, kiere tyż niy grajōm. Przeskakujymy beztōż wartko na zabrzańsko, niedzielno, świyżo murawa i szukōmy bala...
Górnik bez godki bōł w piyrszej połowie drużynōm o wiynkszym szwōngu na brama przeciwnika. Potwierdziyła to brama klupniynto już w 18. minucie. Z roga cyntruje wtedy Aleksander Kwiek, a od zola nojlepij odbijajōm sie fusbaloki Bartosza Kopacza, kiery zaroski dobrze pokieruje bal do siatki. Wynik otwarty!
Górnik mioł sztyjc wiyncyj do godki. W 29. minucie piyknie z kamratami pogroł Prejuce Nakoulma. Wartko klepka i dynamiczne wlecyni Prezesa w szesnostek dało szansa Ireneuszowi Jeleniowi na szlag z bliska. Samek jednak refleksym wykozoł sie torman. Kamiński odruchowo ciepnōł sie i wybiōł bal za linia bramkowo.
Ruch mōg hneda odpedzieć skuli ausdruka Łukasza Skorupskigo. Bramkorz z Zabrzo przi wykopie bala trefiōł niywinnego boroczka w niebieskij koszulce, kiery wracoł gynał na swojo połowa. Odbity bal dostowo w geszynku Marek Zieńczuk, ale doświadczōny grocz Ruchu niy wykorzystuje ausdruka bramkorza, z kierym mioł okazjo sie spróbować oko w oko.
W drugij połowie Ruch trocha sie budzi. Bez co szpil robi sie jeszcze bardzij ciekawy. Nawet niylicznym na trybunach przedstawicelkōm tej gryfniejszej płci za fest sie tym razym niy mierznie. Żodnej stoprocyntowej sytuacji Niebiescy jednak niy złōnaczyli. Blisko wyrownanio było yno po szlagu Panki. Bal jednak pofurgnōł minimalnie nad latōm.
Zamiast wyrownanio oglōndalimy dobici przeciwnika w wykōnaniu gospodorzy. Irek Jeleń tyroł w tym szpilu jak dziki i to w kōńcu prziniōsło efekt w 83. minucie. Po zagraniu długigo bala z środka pola dziwalimy sie na pierōnym niyrowny siłowo pojedynek sprinterski. Przi rozfechtowanym synku z Cieszyna zdało sie, że obrōńcy Ruchu stajōm. Tak choby młody jelyń wyprzedzoł na pełnym szwōngu jakoś piyrszo-lepszo sosna zwyczajno. Akcjo jes wykōńczōno prawidłowo i mōmy już 2:0.
Jak chcōm to umiōm, yno czamu tak niyskoro? Takij mobilizacji w ekipie z Zabrzo trza było na szpile z Legiōm i resztōm wiosynnych pogrōmcōw. 3 punkty chyto Górnik i wskakuje nazot na 3. plac w tabeli. Ruch sztyjc jes dopiyro trzinosty i dalij ni ma durś pewny utrzimanio.
Górnik Zabrze - Ruch Chorzów 2:0 (1:0)
Bramy: Bartosz Kopacz (18. min.), Ireneusz Jeleń (83. min.)
Górnik: Łukasz Skorupski - Paweł Olkowski, Adam Danch, Bartosz Kopacz, Ołeksandr Szeweluchin - Tomasz Zahorski, Krzysztof Mączyński, Aleksander Kwiek (77. min. - Sergei Mosnikov), Bartosz Iwan (83. min. - Grzegorz Bonin), Prejuce Nakoulma - Ireneusz Jeleń (90. min. - Konrad Nowak).
Ruch: Krzysztof Kamiński - Željko Dokić, Marcin Baszczyński, Piotr Stawarczyk, Marcin Kikut (35. min. - Igor Lewczuk) - Marek Zieńczuk, Mindaugas Panka, Filip Starzyński (84. min. - Andrzej Niedzielan), Marek Szyndrowski (67. min. - Jakub Smektała), Łukasz Janoszka - Maciej Jankowski.
Grzegorz Buchalik, student z Żor, uwielbia grać w piłkę i relacjonuje po śląsku mecze ekstraklasy. Ślōnski fusbal ma udowadniać, że język śląski to nie tylko żarty, co nie znaczy, że żartów musimy usilnie unikać. Ślōnski fusbal ma przede wszystkim promować śląski język i sport. Teksty adresowane są nie tylko do Ślązaków, dla których godka jest językiem ojczystym, wyniesionym z domu. Grzegorz Buchalik pisze alfabetem łacińskim z tym, że dodaje jedną literę-samogłoskę, zapisywaną jako: ō (jak np. w wyrazach kōnsek", czy pozōr).
ZGADZASZ SIĘ Z AUTOREM BLOGA? JESTEŚ PRZECIW? SKOMENTUJ
*Najpiękniejszy Rynek w woj. śląskim jest w... ZOBACZ I ZAGŁOSUJ
*Majówka 2013: Zobacz, jak spędzić wolne dni. DOPISZ SWOJĄ PROPOZYCJĘ
*Matura 2013: Jak przygotować się do matury, jakich pytań się spodziewać, jak znaleźć dobrego korepetytora? ZOBACZ
*Serial Anna German [STRESZCZENIA ODCINKÓW]
Dołącz do nas na Facebooku!
Publikujemy najciekawsze artykuły, wydarzenia i konkursy. Jesteśmy tam gdzie nasi czytelnicy!
Dołącz do nas na X!
Codziennie informujemy o ciekawostkach i aktualnych wydarzeniach.
Kontakt z redakcją
Byłeś świadkiem ważnego zdarzenia? Widziałeś coś interesującego? Zrobiłeś ciekawe zdjęcie lub wideo?