Buchalik: Górnik-Piast, czyli grubiorze wjyżdżajom na wyższy pokład

Górnik pokozoł w pyndziałek, że bez Milika i z chwilowym brakiym Nakoulmy tyż do sie wygrywać. Wybitnōm skutycznościōm w ataku zabrzańscy fusbaliści ni mogōm sie jednak poasić. Bal w siatce powiniyn znolyź sie pora razy wiyncyj. 3 punkty sōm jednak w kapsie, a dyć o to sie tera nojbardzij rozchodzi.

ZOBACZ TAKŻE:
Derby Górnik Zabrze - Piast Gliwice 1:0 [RELACJA LIVE, ZDJĘCIA]

O osłabiyniu Górnika już spōmniołech, ale trza pedzieć, że Piast tyż musioł łotać dziury kadrowe. Nojbardzij widać było brak Wojciecha Kędziory i... Marcina Brosza. Tryner ślōnskigo byniaminka jes sztyjc zawieszōny w ramach sztrofy za haja jeszcze z jesiyni. Pokludzić Piast w derbach musioł beztōż Dariusz Dudek.

Szpil mōg sie podobać. Widać było, że fusbalistōm obu ekip rychtyk chce sie tyrać po murawie, co w przipadku naszej Ekstraklasy wcale niy musi być zawsze tak durś oczywiste. Niy brakowało sytuacji podbramkowych, przekludzanych nojczynścij przez gospodorzy. To jednak Piast pokozoł zōmb i mōg bajsnōnć jako piyrszy. Już w 3. minucie po zrobiyniu se obrōńcy groźnie szczyloł Ruben Jurado. Bal po tym szlagu przelecioł jednak trocha wele słupka.

Górnik odpedzioł mōmyntalnie, yno z lepszym efektym. W 5. minucie gola zdobywo tyn, kierego skludzyni wywołało nojwiynksze kōntrowersje. Wiynkszość kibicōw niy widziała w nim nastympcy Milika, ale faktym jes, że w pyndziałkowym szpilu to Tomasz Zahorski klupnōł jedynego, zwyciynskigo gola (inkszo sprawa, że przi lepszej skutyczności mōg by sieknōnć jeszcze przinajmij dwa). Po krōtkim rozegraniu roga i cyntrze Kwieka, to właśnie nowy-stary snajper Górnika nogōm zmiynio tor lotu bala tak, że tyn furgnie prosto do siatki. 1:0.

Co do okazji Zahorskigo wypado jeszcze spōmnieć 27. minuta. Długo cyntra Górnika pod nogi napastnika gospodorzy wybijo głowōm Zbozień. Takich geszynkōw czynsto sie niy dostowo! Zahorski kopie przed sia z piyrszej, ale przi tym szlagu z fest bliskij odlygłości piyknōm paradōm ratuje gości Trela. Wynik bez zmian.

Po przerwie zdało sie, że Górnik kōntroluje sytuacjo. Gospodorze już tak fest sie niy fechtowali i niy pilowali z grōm, ale sztyjc to ōni mieli wiyncyj okazji na nastympnego gola. W ekipie z Zabrzo chyba trocha jednak brakowało takigo typowego snajpera.
Górnikōm fest zawadzoł tyż tamek gliwicki torman, kiery chytoł co yno sie dało. Styknie yno spōmnieć jak dwa razy okozoł sie lepszy oko w oko z Olkowskim, abo jak udanie ciepnōł sie przi szlagu z wolnego w wykōnaniu Bembena.

W kōńcōwce blisko drugigo gola było jeszcze po szlagu Kwieka. Bal jednak trefiōł yno w słupek. Goli już niy bydzie. 3 punkty zostowajōm w Zabrzu. Trza ofyn pedzieć, że to gospodorze bez godki byli lepszōm drużynōm w tym szpilu.

Zwyciynstwo Górnika i przegrano Legii - czego wiyncyj trza do szczynścio w Zabrzu? Górnik jes już trzeci i na wiyrchu tabeli robi sie fest ciekawie... Piast Gliwice po 16. kolejce znojdymy tyż sztyjc doś wysoko - plac nr 7.

Górnik Zabrze - Piast Gliwice 1:0 (1:0)
Gol - Tomasz Zahorski (5. min.)
Żōłte kartki: Seweryn Gancarczyk, Mariusz Przybylski - Paweł Oleksy, El-Mehdi Sidqy,.
Syndziowoł: Paweł Pskit
Kibicōw: 3 000 (yno z Górnika)
Górnik: Łukasz Skorupski - Michał Bemben, Adam Danch, Ołeksandr Szeweluchin, Seweryn Gancarczyk - Paweł Olkowski (90+3 min. Konrad Nowak), Mariusz Przybylski, Aleksander Kwiek, Krzysztof Mączyński, Tomasz Zahorski (83 min. Grzegorz Bonin) - Wojciech Łuczak (90+2 min. Bartosz Iwan).
Piast: Dariusz Trela - Damian Zbozień, Adrian Klepczyński, El-Mehdi Sidqy, Paweł Oleksy (57 min. Łukasz Krzycki) - Bartosz Szeliga, Radosław Murawski (71 min. Rudolf Urban), Artis Lazdins (80 min. Tomas Docekal), Tomasz Podgórski, Mateusz Matras - Ruben Jurado.

Grzegorz Buchalik
www.silesiansport.pl

CZYTAJ KONIECZNIE:
Blog Grzegorza Buchalika Ślonski fusbal CZYTAJ TUTAJ

*Nowe egzaminy na prawo jazdy 2013 [RANKING SZKÓŁ JAZDY]
*Nowe egzaminy na prawo jazdy 2013 [ZOBACZ WIDEOTESTY]
*STUDNIÓWKA 2013: Zobacz najpiękniejsze dziewczyny [SUPERFOTKI]
*Sześć pomysłów na zmianę wizerunku Górnego Śląska [ZOBACZ I SKOMENTUJ]