Buchalik: Podbeskidzie vs. Piast - Idom, idom... po spadek i puchary

Fusbaliści z Bielska-Białej to nastympno w historii ekstraklasy drużyna, kiero próbuje na wiosna zrealizować ,,mission impossible", utrzimani po darymnej jesiyni. Trza ofyn prziznać, że ich postawa w tej rundzie gańby na pewno niy przinosi. Piyrszo porażka na wiosna zanotowali dopiyro tydziyń tymu z Poloniōm w Warszawie. Rywale jednak niy chcōm za pierōna grać pod nich. Skuli przegranej Ruchu z Pogoniōm do bezpiecznego placu przed sobotnim szpilym tracili zaś 6 punktōw.
Durś inkszo sytuacjo majōm za to w Gliwicach. Tamek wiosna jes jeszcze lepszo, a niyspodzianka sezōnu wisi w lufcie. Piast jes blisko zakwalifikowanio sie do Ligi Europejskij, kierej przinajmij zarzōnd klubu sie niy lynko, a to ważne, bo na dyć w inkszych klubach bywo z tym rozmańcie.

ZOBACZ TAKŻE:
Podbeskidzie Bielsko-Biała - Piast Gliwice 1:2 [ZDJĘCIA, RELACJA, OPINIE]

Jak widzymy beztōż, szpil zapowiadoł sie co najmij ciekawie. Emocje mielimy od piyrszych minut, w kierych wiyncyj do godki mieli gospodorze. Już w 5. minucie jedyn z nojlepszych snajperōw ligi objechoł tormana Piasta. Fankowy pokozoł jednak spolōnego, ale Trela dostoł piyrszy sygnał, że sam ni ma gupot. Na Demjana trza se dać pozōr!

CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL

O tym, że słowackigo napastnika ciynżko uwachować i że poradzi szczylać gole z niczego, grocze Piasta przekonajōm sie jeszcze w 41. minucie. Po krōtko rozegranym rogu Damian Chmiel próbuje włazić z balym do środka i cyntrować, ale zagrani jes zablokowane. Futbolōwka wraco jednak do Chmiela, kiery ustawiōny zadkiym do bramki przeciepuje bal za pleca. Do głōwki wyskakuje Demjan i reszty scynariusza niy trza już opisywać. 1:0! Tego jeszcze niy grali! Grocz ekipy z samego dna tabeli jes blisko snajperskij korōny za nojwiyncyj goli. W tym sezōnie natrzaskoł ich już 13.

Hneda po przerwie bal zaś znojdzie sie w siatce Piasta, ale brama niy bydzie uznano. Tomasz Górkiewicz przi dobitce po szlagu Demjana bōł na spolōnym.

Goście w kōńcu jednak pokożōm, czamu sōm tak wysoko w tabeli. Tak rychtyk pokoże to w 56. minucie Pavol Cicman. Grocz Piasta z prawego skrzidła wlezie w szesnostka gospodorzy, choby świyżo nabrōszōny nōż w masło. Po wkryncyniu w zol obrōńcōw zagro mocno do środka, a bal szpetnie trefi tamek Bartłomieja Koniecznego i bez cufal znojdzie sie w siatce, co do gościōm wyrownani.

Niyskorzij Piast bydzie mioł nastympne okazje, po kierych mōg by już w tym spotkaniu kludzić. Nojprzōd gryfny szlag z dystansu Podgórskigo trefi w słupek, a potym po próbie Cicmana do porzōndku wysztrekuje sie w bramce Richard Zajac, dziynki czymu wynik dalij bydzie rymisowy.

Rozwiōnzani przinosi dopiyro 80. minuta. Wartko wykludzōno kōntra Piasta wykańczo wtedy Marcin Robak. Nowy grocz Piasta zdōnżōł jeszcze zatrzimać se bal na szesnostym metrzei i przi asyście obrōńcy elegancko wycylować po długim słupku. Torman ni mo wiela do godki.

Kibicōm serca zaklupiōm warcij jeszcze w 86. minucie. Bal zagrany z wolnego jeszcze z połowy gospodorzy jakimś cudym trefio na piōntym metrze bramki Piasta do Telichowskigo. Błażej to jednak niy ,,Franek łowca bramek". Niy poradziōł odmiynić wyniku spotkanio.

Nastympny kibel zimnej wody spado na karki synkōw z Bielska-Białej. Jeszcze yno 3 szpile, a sztyjc 6 oczek straty do 14. placu. Jak za tydziyń niy zrobiōm punktōw to pomału zostanie im yno walka z Bełchatowym i liczyni na to, że pan Król niy poradzi zbamōncić kōmisji licyncyjnej i Polonia rychtyk bydzie zdegradowano.

Piast o ,,królewski" problymy finansowe niy musi sie starać. Fusbaliści z Gliwic sōm nazot na 3. placu i zostowajōm im już yno 3 kroki do Ligi Europy. Zapowiado sie doprowdy ciekawo kōńcōwka sezōnu.

Podbeskidzie Bielsko-Biała - Piast Gliwice 1:2 (1:0)

Bramy: Robert Demjan (41) - Bartłomiej Konieczny (56-sam.), Marcin Robak (80)
Podbeskidzie: Richard Zajac - Błażej Telichowski, Bartłomiej Konieczny, Dariusz Pietrasiak, Tomasz Górkiewicz - Damian Chmiel (76. Adam Deja), Anton Sloboda (57. Michal Piter-Bucko), Marcin Wodecki, Dariusz Łatka, Marek Sokołowski (64. Piotr Malinowski) - Robert Demjan.
Piast: Dariusz Trela - Adrian Klepczyński, El-Mehdi Sidqy, Jan Polak, Damian Zbozień - Tomasz Podgórski, Artis Lazdins (46. Rudolf Urban), Mateusz Matras, Ruben Jurado (46. Tomas Docekal), Pavol Cicman (76. Matej Izvolt) - Marcin Robak.

Grzegorz Buchalik, student z Żor, uwielbia grać w piłkę i relacjonuje po śląsku mecze ekstraklasy. Ślōnski fusbal ma udowadniać, że język śląski to nie tylko żarty, co nie znaczy, że żartów musimy usilnie unikać. Ślōnski fusbal ma przede wszystkim promować śląski język i sport. Teksty adresowane są nie tylko do Ślązaków, dla których godka jest językiem ojczystym, wyniesionym z domu. Grzegorz Buchalik pisze alfabetem łacińskim z tym, że dodaje jedną literę-samogłoskę, zapisywaną jako: ō (jak np. w wyrazach kōnsek", czy pozōr).

ZGADZASZ SIĘ Z AUTOREM BLOGA? JESTEŚ PRZECIW? SKOMENTUJ

*Najpiękniejszy Rynek w woj. śląskim jest w... ZAGŁOSUJ i ZMIEŃ WYNIK
*Matura 2013: Pytania egzaminacyjne na 100 proc. ZOBACZ
*Nudyści już zawitali na plaże ZOBACZCIE, gdzie spotkacie naturystów w woj. śląskim
*Tak zdasz egzamin na prawo jazdy kat. A na motocykl ZDJĘCIA i WIDEO