Buchalik w blogu Ślonski fusbal: Fusbaloki pomału chowie sie do szranków

Fusbaloki pomału chowie sie do szrankōw. Runda jesiynno skōńczyła sie już na wszyjskich poziōmach rozgrywkowych w Polsce od I ligi do klas C, chocioż np. w rybnickij A-klasie ,,gro sie już wiosna". Jednak niy o A-, a o Ekstra-klasie bydymy godać. Na dyć yno tamek fusbalowo jesiyń tak rychtyk jeszcze trwie. Dziynki tymu, że synki ci majōm płacōne za tyrani w mrozie, my niy muszymy jeszcze durś przeciepywać sie na skoki narciarski i dziwać sie na zmarzniyntego Waltera Hoffera.

Ekstraklasa

Sztyry w pleca i haja

Ciynżko w tym sezōnie majōm ci, kierzi obstawiajōm wyniki Piasta w zakładach bukmacherskich. Synki z Gliwic grajōm rozmańcie: roz po eleganckim szpilu wygrywajōm, inkszym razym dostowajōm wklupane tak jak tera. Zawsze jednak przi ich szpilach kibice widzōm bal w siatce, nigdy ni ma rymisōw. Przinajmij żodnymu sie niy mierznie, tym bardzij jak fusbaliści zapewniajōm nōm taki efekty specjalne jak w tyn piōntek.

Poczōntek szpilu w Kielcach nasi ewidentnie przedrzymali. Brama tracōm już w 2. minucie, a bal do siatki wrażo János Székely. Za chwila mōglimy mieć nazot rymis. Wojciech Kędziora przegrywo jednak pojedynek z bramkorzym Korōny, kiery poradziōł chwila niyskorzij wychytać jeszcze pora inszych prób naszych.

Z czasym syndzia zaczōł pokozywać coroz wiyncyj żōłtych kartek i zrobiyło sie nerwowo. Haja wisiała w lufcie. Skuli tego tryner Piasta zdecydowoł symnōnć z boiska nojbardzij nerwowego grocza. Fernando Cuerda żodnego gola tego dnia niy klupnōł, ale za to mioł okazjo kōmuś wklupać i w kōńcu jōm wykorzystoł. Hiszpan jeszcze przed przerwōm śloz z boiska, yno poza wyznaczōnym placym zmian. Gospodorze zaczli sie o to ciepać. Cuerda wdoł sie z kimś do godki i hneda chopy już sie prali. Sytuacjo w kōńcu zostało opanowano.

Drugo połowa Piastunki zaś zaczynajōm darymnie. Śpiymy. W 47. minucie robi sie miszōng pod bramkōm Piasta, co wykorzystuje Pavol Stano i jes 2:0. To jednak ni ma kōniec, bo jakiś 10 minut niyskorzij jes już 3:0. Foszmańczyk wykłodo na dziewiōnty meter bal Lenartowskimu. Tyn pewnie dowo gospodorzōm nastympno bramka.

Szczylani bramek skōńczyło sie w 76. minucie. Techniczny szlag Vlastimira Jovanovicia ustalo wynik szpilu na 4:0. Gospodorze sōm lepsi i trza sie cieszyć, że Piast niy przegroł wyżyj.

Szpetnie sie zaczōn dō nos tyn tydziyń. W tabeli ni ma jednak tak źle. Piast sztyjc znojdymy w środku. Za tydziyń zaś sie mogōm poprawić. Bezmała ludzie uczōm sie na błyndach. Beztōż Piastunkōm przinajmij niy braknie podryncznikōw do nauki przed nastypnym szpilym.

Zmynczyni

Górnik, kierego nazywo sie rewelacjōm jesieni, ostatnio straciōł trocha ze swojigo szwōngu. Nasi w tym sezōnie dycki byli chwolyni za szwarny do oka, ofynsywny styl gry. Niestety stylu tego niy udało sie włōnczyć w szpilu z Zagłębiem Lubin (piyrszo porażka). Z Poloniōm było już lepij, ale trza było sie podzielić punktami. W tym tydniu, w spotkaniu z Pogoniōm fusbaliści z Zabrzo zaś mieli biyda sie rozfechtować…

Ni ma co fandzolić o piyrszej czynści szpilu. Mono na remōntowanym stadionie w Zabrzu odciyli chwilowo dopływ wody do prysznicōw? Na dyć fusbaliści obu ekip grali tak choby ni mieli kaj sie po szpilu okōmpać i beztōż niy chcieli za fest sie spocić. Niy widzielimy wiela okazji podbramkowych. Ni ma co spōminać.

Tryner Nawałka w kōńcu doł pozōr, że coś samek niy gro i po godzinie gry przekludziōł zmiany. Na boisko wleźli Zachara i Nakoulma i to ōni pōmōgli rozfechtować zabrzańsko maszyna. W kōńcu zaczło sie coś dzioć. Nasi szczylali na bramka gości z rozmańtych pozycji. Niystety ni ma żodnego efektu.

Na ataki Górnika goście odpedzieli golym, na szczynści niyuznanym. Bal znod sie w bramce Skorupskigo po szlagu Nolla. Syndzia jednak dobrze zejrzoł, że chop tyn bōł na spolōnym i jes sztyjc po zero.

Litości arbiter ni mioł już za to w 76. min. Górnik bez gupota traci jednego grocza. Aleksander Kwiek za szpetny faul lōnduje w szatni z czewōnōm kartkom.

Goście niy poradziyli wykorzystać przewogi. Niych sie jeszcze cieszōm, że po akcji Nakoulmy spotkanio niy przegrali. Ostatecznie 0:0. Szkoda, bo Górnik mōg sie dźwignōnć w tabeli, skuli porażki Polonii Warszawa.

,,Niebieskim" zaś niy idzie

W Chorzowie w niedziela trefiyły sie dwie wielki firmy, kiere tworzōm doś porzōndny kōnsek historii polskigo fusbalu. Ofyn jednak prziznōmy, że tak Ruch, jak i Wisła sōm teroski w lekkim kryzysie i niy grajōm tak dobrego fusbalu jak jeszcze niy tak downo.

W Chorzowie fusbaliści chyba trocha warcij tyrali po murawie niż w Zabrzu, ale i tamek do przerwy na tablicy wynikōw stoło 0:0. Tak rychtyk gospodorze powinni jednak wygrywać. Dyć w 30. minucie elegancko bal do siatki Wisły wraziōł głowōm Igor Lewczuk. Gola ni ma. Syndzia ponoć widzioł spolōnego. Ciynżko sie ś nim zgodzić.

Sytuacjo zmiyniła sie dopiyro w drugij czynści drugij połowy. Bohatyrym gości zostowo wtedy Łukasz Garguła. Nojprzōd po elegancko przekludzōnej akcji, poru wartkich podaniach i wystawie Boguskigo grocz tyn zdobywo gola na 0:1 (73. min.). Niyskorzij w 90. minucie jes już pogodane. Garguła spokojnie wykańczo tym razym dobro akcjo Sikorskigo. 0:2.

To jednak ni ma koniec. Mōmy trzecio minuta doliczōnego czasu gry i na 1:2 klupie Andrzej Niedzielan. Doświaczōny snajper znod sie tam kaj mioł być i poradziōł skutycznie zagłōwkować. Na chwila iskierka nadziei zaś sie pojawiyła, ale hneda mōmyntlnie zgasła razym z ostatnim gwizdkiym syndzigo.

Ruch w tabeli wyprzedzo już yno GKS Bełchatów i Podbeskidzie, kiere doś fest odstowajōm punktowo od reszty. Zieliński musi chyba spamiyntać swoich groczy.

Grzegorz Buchalik
www.silesiansport.pl

*Zniewalający wystrój restauracji Kryształowa Magdy Gessler ZOBACZ ZDJĘCIA i WIDEO
*Katowice mają podziemny dworzec autobusowy[ZOBACZ ZDJĘCIA I WIDEO]
*Bytomianie dziękują TVN za materiały patolgię [ZOBACZ, Z CZEGO CHCĄ BYĆ DUMNI