Buchalik w blogu Ślonski fusbal: Nazot na trowie

Jarosław Kret mōgby sie tukej wadzić, ale fol kibicōw zgodzi sie ze zdaniym, że wiosna latoś zaczyno sie już w lutym. Hneda dowiymy sie na wiela realno jes walko o 15. mistrzostwo w Zabrzu i czy jes jakoś nadzieja na czyrwcowy happy end w Bielsku. Obejrzymy tyż czy zapowiadano poprawa ujrzymy w grze Ruchu i sprawdzymy na wiela stać osłabiōny skuli rozmańtych kōntuzji gliwicki Piast...

ZOBACZ WIĘCEJ ZDJĘĆ Z MECZU RUCH CHORZÓW - LECH POZNAŃ

Ekstraklasa

Durś nowy klub...

Po darymnej jesiyni i kadrowej rewolucji, ciynżko było spodziywać sie cudōw w Biesku-Białej. Piyrszy wiosynny szpil wraco jednak kibicōm nadzieje. Podbeskidzie naklupało gościōm tak, że ci ni mōgli sie od śmiychu utrzimać. 4:0 i Jaga jedzie du dōm.
Jak na razie do efektōw zimowego ,,luftowanio" szatni w Bielsku-Białej ni mogiymy sie prziczepiać. Lekko odmłodzōno ekipa pokozała w sobota po połedniu na swoim placu, że gańby na wiosna niy bydzie. Zaroski po piyrszym gwizdku widać było, że synkōm chce sie grać i tyrać po boisku. Jaga od poczōntku ni miała wiela do godki.

Jes piyrszo minuta, piyrszy szlag i piyrszy gol. Przi cyntrze Malinowskigo, Demjan urywo sie Pazdanowi na krōtkim słupku i wrażo bal głowōm do siatki tak, że bramkorz ni mo wiela do godki. Jaga niy poradziyła dobrze sie spamiyntać, a hneda gospodorze kludziyli już 2:0. Autorym gola jes tym razym świyżo wytransferowany z Górnika, Błażej Telichowski, kiery durś niywachowany na piōntym metrze od bramki, efektownym szlagiym głowōm wykorzystuje cyntra z roga, przedłużōno przez Marka Sokołowskigo.

Wartko gra gospodorzy mōgła sie podobać. Tak elegancko niy wyglōndało to za to z perspektywy trynera Hajty. Jaga niy yno niy umiała przekludzić porzōndnej akcji, ale miejscami nawet miała biyda wylyź ze swojij połowy. Nojbliżyj zdobycio gola goście byli w 21. minucie. Lobować Zajaca próbowoł wtedy z dalszej odlygłości Plizga. Bal spod jednak lekko nad latōm.
W drugij połowie gospodorze ni mieli zamiaru dać se wyrwać trzech punktōw. W 66. minucie Demjan odwdziynczōł sie Sokołowskimu za asysta z piyrszej połowy. Jego niyudano próba szlagu głowōm po cyntrze z wolnego, bez cufal skōńczyła sie asystōm przi bramce tego drugigo. 3:0.

Nojlepszy snajper Podbeskidzia zdōnży jednak sieknōnć jeszcze swojigo drugigo gola w spotkaniu. W kōńcu bydzie brama ,,z akcji"... Po wartkij kōntrze Telichowski dogro bal ,,miōd-malina" do Demjana, kiery niż klupnie brama, przody zrobi jeszcze obrōńcy za błozna. Ta akcjo yno podsumowuje bezradność Białostockij obrōny w tym szpilu. Gościōm w sobota ni mōgli pōmōc, ani starzi kadrowicze jak Frankowski i niyskorzij jego zmiynnik, Smolarek. 3 punkty zostowajōm w Bielsku.
Chocioż Podbeskidzie w sobota oroz zrobiyło tela punktōw co bez pōł jesiyni, w Bielsku-Białej na razie za wczas na świyntowani. Do bezpiecznego placu w tabeli sztyjc majōm daleko. Za pora kolejek mono dowiymy sie czy to Podbeskidzie rychtyk tak sie spamiyntało, czy to yno Jaga przespała prziszykowania.
Ponoć miało być lepij...

Gra Ruchu miała bezmała sie od wiosny poprawić. Sztyjc jednak ciynżko ujrzeć w nich drużyna z ostatnigo sezōnu, kiero do kōńca grała o mistrza. Na start wiosynnych rozgrywek Ruch dostowo wklupane od Lecha. 4:0 w pleca u sie to trocha gańba, nawet jak gro sie z ekipōm z ,,wiyrchu". O niedzielnym spotkaniu piyrszy zapōmnieć bydzie chcioł nowy-stary grocz Ruchu, Marcin Baszczyński.

Scynariusz w Chorzowie mōmy podobny jak w Bielsku. Na Cichej klupani bramek zaczło sie w 2. minucie. W środku pola bal opanowoł Kasper Hamalainen. Fin ściōngnōł na sia poru obrōńcōw i zagroł prostopadły bal do Bartosza Ślusarskigo. Tyn elegancko wloz w tympo i mioł jeszcze na tela dużo placu, że mōg se przijōnć bal i wycylować po długim słupku. 0:1.
W 18. minucie Ślusarski mōg poprawić swōj dorobek, ale z bliskij odlygłości niy trefiōł ani w światło bramki. Noga do kowola! Niyskorzij Peskovicia niy umieli pokōnać Tonev i Hamalainen.

Pod drugōm bramkōm aż tela sie niy dzioło. Szlagōw z dystansu próbowali Baszczyński i Tymiński. Ausdruka obrōny niy poradzioł wykorzystać Sultes, kiery znod sie nawet w sytuacji sōm na sōm.

Wracōmy pod bramka ,,Niebieskich", bo to by było na tela jak godōmy o ich akcjach w ofynsywie. W doliczōnym czasie gry Lech zaczyno stały fragmynt gry z rogu boiska. Przi cyntrze Hamalainena na piōntym metrze robi sie lekki miszōng, ale ostatecznie po opanowaniu bala na klacie do siatki trefio Marcin Kamiński. Brama gynał do szatni.

W drugij czynści szpilu nojlepszo i chyba jedyno dobro okazjo na gola do gospodorzy zawalōł Jankowski. Zaś po błyndzie obrōny mielimy sōm na sōm i zaś gola z tego niy było.

Potym było już yno gorzij. W 61. minucie dopiyro co wkludzōny na boisko Teodorczyk zagrywo z prawego skrzidła w szesnostka, kaj tor lotu bala przecino Baszczyński. Niystety to ni ma udano interwyncjo. Bal w siatce i 0:3.

Wynik w 87. minucie ustali jedyn z nojlepszych tego dnia na murawie, Kasper Hamalainen. Po jego szlagu praje w sōm winkel bydzie już ,,posprzōntane". 4:0 w pleca. Tak to ni może wyglōndać. Jak synki z Chorzowa za wczasu sie niy spamiyntajōm to hneda może sie zrobić ciepło. Utrzimania ni mogōm być pewni.

Grzegorz Buchalik
www.silesiansport.pl

CZYTAJ KONIECZNIE:
Blog Grzegorza Buchalika Ślonski fusbal CZYTAJ TUTAJ

*Slash w Katowicach! Spodek oszalał [SENSACYJNE ZDJĘCIA i WIDEO]
*Hajmat, hanysy, gorole, powstania śląskie, godka! [Śląski Słownik Pojęć Kontrowersyjnych]
*Ranking szkół nauki jazdy 2013
*Poznaj tajemnicę abdykacji papieża Benedykta XVI