Buchalik: W dziesiynciu po 3 punkty. Liga Europy coroz bliżyj Gliwic

Szpil przi ul. Okrzei bez godki ni mioł być spotkaniym z zorty tych o przisłowiowo czopka śliwek. Skuli niyspodziywanie dobrej wiosny w wykōnaniu synkōw z Gliwic stawkōm spotkanio był plac na ekstraklasowym podium, jak tyż zrobiyni wielkigo kroku do europejskich pucharōw.

CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL

Poza tym sztyjc aktualny mistrz Polski liczōł w Gliwicach na rewanż za jesiyń. Na dyć to właśnie ślōnski byniaminek w listopadzie niyźle poszterowoł wrocławskich kibicōw. Piast chocioż przegrywoł, poradziōł odpedzieć wtedy gospodorzōm trzema bramami i pojechoł du dōm z kōmpletym punktōw, i niymałōm satysfakcjōm z rozklupanio Mistrza Polski.

Spotkani w Gliwicach zaczyno sie podobnie jak te we Wrocławiu pōł roku do zadku. Miech z bramkami otwiyrajōm zaś grocze Śląska. W 16. minucie gry Ćwielong próbuje zagrać bal wiyrchym za pleca obrōńcōw Piasta. Bal odbity głowōm przez kieregoś z nich trefio jednak bez cufal pod nogi Cetnarskigo, kiery wartko odgrywo na lewo do Stevanovicia. Słowyniec zdōnży jeszcze przijōnć futbolōwka i wycylować gynał pod lewy słupek. 1:0.

Piast ciepnōł sie do ataku i już hneda mōg wyrownać. Swoich wymarzōnych okazji niy poradzili niystety wykorzystać ani Robak, ani Podgórski. Te niywykorzystane sety mōgły sie zymścić po szlagu Ćwielonga, ale tyn tyż minimalnie minōł bramka.
Rychtyk porzōndne emocje, kiere mōgły niy jednego kibica prziprawić o hercklekoty zaczyły sie dopiyro w drugij połowie. Styknie spōmnieć, że fani fusbalu przi ul. Okrzei w drugich 45 minutach doczkali sie jeszcze sztyrech goli, dwóch elwrōw i czerwōnej kartki...
Szpil pōmōg rozfechtować syndzia Borski, kiery hneda po przerwie odgwizdoł doś kōntrowersyjnego elwra do gospodorzy. Ciynżko pedzieć nawet czy rozchodziło sie samek o faul czy zagrani rynkōw. Faktym jednak jes, że Ruben Jurado w 52. minucie trefio do siatki z jedynostu metrōw i robi sie 1:1.

CZYTAJ KONIECZNIE:
BLOG GRZEGORZA BUCHALIKA: ŚLONSKI FUSBAL

Niy zetrwało wiyncyj jak 5 minut, a Piast już wygrywoł. Tym razym sytuacjo jes ewidyntno. Szpetny ausdruk trefio sie Waldimu Sobocie. Pressing sie opłaciōł. Rozfechtowany Paweł Oleksy odbiyro bal reprezyntantowi Polski i jego mocny szlag po krōtkim rogu wykludzo gospodorzy na 2:1.

Teroski to goście muszōm ciepnōnć sie do przodku, bez co narażōm sie pora razy na groźne kōntry Piasta. Wynik jednak niy zmiyni sie aż do 75. minuty, kej syndzia po roz drugi pokoże na wopno. Zdobywca ostatnigo gola zaś wpisuje sie do protokołu, tym razym jednak powodym jes czerwōno kartka, kiero Oleksy dostowo za targani za koszulka przeciwnika. Cetnarski lecioł na sōm na sōm, beztōż tym razym ni ma co sie wadzić z syndziōm. Elwer bez godki. Stevanović po roz drugi ni mo litości do Treli i spokojnie trefio na 2:2.

Przody po stracie gola i osłabiyniu zdo sie, że Piast już yno brōni rymisu, ale w odpowiednim mōmyncie okozuje sie, że jes durś na opy. Gospodorze pokozujōm, że w 10 tyż idzie skutycznie fechtnōnć sie do przodku. W 94. minucie synki z Gliwic wyskakujōm na połowa przeciwnika z wartkōm kōntrōm jak łebki na rapsa. Wypad bez płot sie udowo. Bohatyrym akcji jes Cicman, kiery elegancko wkludzo bal w szesnostka i wystawio go Murawskimu. Tyn trefio tam kaj trza i stadiōn gupnie!
Pozamiatane! Śląsk ni mo już ani czasu sie spamiyntać. 3 punkty zostowajōm w Gliwicach. Piast ściepuje rywala z podium i teroski udział ślōnskigo byniaminka w Lidze Europy robi sie rychtyk coroz bardzij realny.

Piast Gliwice - Śląsk Wrocław 3:2 (0:1)
Bramy: Ruben Jurado (52-elwer), Paweł Oleksy (58), Radosław Murawski (90+4) - Dalibor Stevanović (16 i 75-elwer)
Czerwono kartka: Paweł Oleksy (73-faul)

Piast: Dariusz Trela - Adrian Klepczyński, Jan Polak, El-Mehdi Sidqy, Paweł Oleksy - Matej Izvolt (73. Pavol Cicman), Mateusz Matras, Ruben Jurado (76. Damian Zbozień), Artis Lazdins (90. Radosław Murawski), Tomasz Podgórski - Marcin Robak
Śląsk: Rafał Gikiewicz - Tadeusz Socha, Rafał Grodzicki (86. Mariusz Pawelec), Adam Kokoszka, Krzysztof Ostrowski - Waldemar Sobota, Marcin Kowalczyk (67. Eric Mouloungui), Sebastian Mila, Dalibor Stevanović, Piotr Ćwielong - Mateusz Cetnarski.

Grzegorz Buchalik, student z Żor, uwielbia grać w piłkę i relacjonuje po śląsku mecze ekstraklasy. Ślōnski fusbal ma udowadniać, że język śląski to nie tylko żarty, co nie znaczy, że żartów musimy usilnie unikać. Ślōnski fusbal ma przede wszystkim promować śląski język i sport. Teksty adresowane są nie tylko do Ślązaków, dla których godka jest językiem ojczystym, wyniesionym z domu. Grzegorz Buchalik pisze alfabetem łacińskim z tym, że dodaje jedną literę-samogłoskę, zapisywaną jako: ō (jak np. w wyrazach kōnsek", czy pozōr).

ZGADZASZ SIĘ Z AUTOREM BLOGA? JESTEŚ PRZECIW? SKOMENTUJ

*Najpiękniejszy Rynek w woj. śląskim jest w... ZAGŁOSUJ i ZMIEŃ WYNIK
*Matura 2013: Pytania egzaminacyjne na 100 proc. ZOBACZ
*Nudyści już zawitali na plaże ZOBACZCIE, gdzie spotkacie naturystów w woj. śląskim
*Tak zdasz egzamin na prawo jazdy kat. A na motocykl ZDJĘCIA i WIDEO