Buchalik w blogu Ślonski fusbal: "Prziłożyć do pieca" - ratowani klubowego budżetu...

Szkoda, że zaś yno sprzedowōmy. Kluby ofyn prziznowajōm się, że szukajōm piniyndzy. Mono jednak dziynki tymu znojdzie sie w naszych klubach kōnsek placu do inkszych młodych Arkadiuszōw? Zdałoby sie poru takich jeszcze znolyź. Mono, kieryś sie wybije? Darymnie synki na te zimowe zgrupowania chyba niy jeżdżōm…

Sōm my kaś w połowie fusbalowej zimy, a nawet kōnsek dalij. Prziszykowania do wiosny sōm już jednak downo zaczynte. Nawet w Klasach A, B, C szportowcy już trynujōm i tyrajōm po zōmiyntach. Tym z klasy ,,Ekstra", kierzi na zgrupowania jeżdżōm do Portugalii, czy Turcji, śniyg raczyj niy powiniyn zawadzać. Do kibicōw nojciekawsze jes jednak teroski to co robi szefostwo ich klubōw. Jaki jeszcze szykujōm nōm sie transfery?

Dwa nojwiynksze ślōnski kluby straciyły w tym okiynku swoich nojlepszych snajperów. Prezesy z Zabrzo i Chorzowa, niy chcōm durś rozōnaczyć se składu, beztōż na szczynści wiynkszych wyprzedaży niy przewidujōm. Trza było jednak ,,prziłożyć trocha do pieca coby niy wygorało", tzn. wciepnōnć do klubowej kasy pora złotych z sprzedanio po jednym groczu. Na dyć w budżecie piniyndzy jes sztyjc za mało.

Po pyndzyjo czy po sława?

Dziynnikorze z rozmańtych tabloidowych gazet ,,sprzedali" już co prowda połowa składu tak Górnika, jak i Ruchu. Tak rychtyk jednak wiela z prowdy w tym niy było. Zdo sie, że Nakoulma i Skorupski jeszcze trocha se w Zabrzu pokopiōm do bala. Podobnie bydzie chyba z Jankowskim Chorzowie. Z Ruchu straci sie za to raczyj Lisowski, no i Piech...

O sprzedaniu Piecha pisołech już w tekście z grudnia. Arek od downa ofyn godoł, że chce z Chorzowa wyjechać. Darymne były próby przedłużynio kōntraktu snajpera, kiery kōńczy sie w czyrwcu. To i tak miało yno pōmōc podbić cyna. Dyć klub wiedzioł, że niy zatrzimie u sia nojlepszego grocza Ekstraklasy 2011/12 i chcioł już yno wytargać za niego jak nojwiyncyj piniyndzy. Ruch za dużo kasy jednak za niego i tak niy dostanie, właśnie skuli tego krōtkigo kōntraktu, kiery zresztōm już zostoł rozwiōnzany.

W ostatnich dniach Piech niy pogroł za fest ani na zgrupowaniu w Kamyniu (bezmała skuli choroby). Hneda myślami furgoł już do Turcji. W pyndziałek fakty zaczyły sie już klarować. 27-letni snajper przeszoł testy medyczne i zaroski podpisoł 3,5 letni kōntrakt z Sivassporym Sivas, jedynostōm ekipōm tureckij ligi. Tamek czeko już na niego kamrat z reprezyntacji Polski Kamil Grosicki. Wypado synkōm yno winszować udanej wspōłpracy.

Piech to ni ma mono tak perspektywiczny fusbalista jak spōmniany wyżyj Milik. Liczymy jednak, że pokoże w Turcji, że niy przijechoł tamek yno szporować na pyndzyjo. Pora bramek powiniyn sieknōnć.
Łotani dziur

Wracōmy nazot na Ślōnsk i sprawdzōmy jak samek łoto sie świyże dziury. Górnik i Ruch postawiyli na skludzani starych znajōmych. Nazot przichodzi Grzegorz Bonin, i ponoć tyż Tomasz Zahorski. Transfery te jednak niy robiōm już takigo wrażynio jak za piyrszym razym.

W Chorzowie stwierdziyli, że Jankowski, Kuświk i Niedzielan niy potrzebujōm nowej kōnkuryncji po odynściu Piecha. Nojwiynkszym wydarzyniym jes beztōż transfer Baszczyńskigo. Synek z Rudy Ślōnskij wraco do ,,Niebieskich" po 13 latach przerwy. Dobrze wiymy, że nasz kadrowicz to niy jakiś belejaki borok. Walczyć poradzi jak mało kiery, ale na karku mo już praje 36 lot.

Mōmy sztyjc jednak nadziejo, że nasi wyhoczōm zaś jakigoś zdolnego łebka, kiery mono podszkoli sie przi tych ,,starzikach" i pokoże wszyjskim wiela jes we werci.

Wielkich transakcji niy spodziywōmy sie w Piaście Gliwice. O wiynkszych zakupach jak miech wopna do sucio linii na razie za dużo niy słychać. Ciekawij zrobiyło sie za to w Podbeskidziu. Nowy prezes Borecki robi porzōndki tak, że wszysko furgo. Jako piyrszy furgnōł tryner, Marcin Sasal. Fusbaliści jednak tyż ni mogōm czuć sie bezpieczni. W klubie z Bielska-Białej niy zagrajōm już raczyj: Ireneusz Jeleń, Krzysztof Król, Liran Cohen, Mateusz Bąk, Mariusz Sacha, Sebastian Ziajka, Bartłomiej Danowski, Sławomir Cienciała, Mateusz Niechciał, Juraj Dancik, Piotr Koman, Matej Nather i Damian Szczęsny. Lista ciōngnie sie jak pierōn, a żodyn niy godo, że jes zawarto. Prezesowi na razie z ciekawszych zakupōw udało sie załatwić Błażeja Telichowskigo z Górnika. Fol groczy przijechało na testy. Borecki ponoć planuje ,,postawić na młodych".

Po jesiyni w Bielsku-Białej zawioło groźbōm spadku i skuli tego ta rewolucjo. Niy piyrszy roz widzymy w naszym fusbalu coś takigo. Niy trza daleko szukać. W sezōnie 2009/10 podobno akcjo ratunkowo w Odrze Wodzisław przekludzoł prezes Kozielski. Jymu udało sie nazbiyrać nawet pora znanych nazwisk. To jednak niy pōmōgło za wiela. Odra spadła do I ligi, a w nastympnym sezōnie znodła sie już durś na dnie, w rybnickij Klasie C, kaj mōgła w kōńcu grać o awans z drużynami z Bzia, Czuchowa, czy Ksiōnżynic.

Transfery to jednak niy wszyjsko. Liczymy, że nasi fusbaliści dobrze wylotajōm okres prziszykowań i na wiosna niy roz dadzōm nōm powody do uciechy. Do poczōntku fusbalowej wiosny zostowo nōm już gynał yno miesiōnc...

Grzegorz Buchalik
www.silesiansport.pl

CZYTAJ KONIECZNIE:
Blog Grzegorza Buchalika Ślonski fusbal CZYTAJ TUTAJ

*Michał Smolorz nie żyje ZDJĘCIA I WIDEO Z POGRZEBU
*Dramatyczny pożar kościoła w Orzeszu-Jaśkowicach [UNIKATOWE ZDJĘCIA I WIDEO]
*Ogólnopolski Ranking Szkół Ponadpodstawowych 2013 SPRAWDŹ NAJLEPSZE LICEA I TECHNIKA
*Horoskop na 2013 rok ZOBACZ, CO MÓWIĄ KARTY