Buchalik w blogu Ślonski fusbal: Warszawioki potraciyli punkty ze Śląskiym

Wiosna bydzie pierōnym ciekawo. Warszawioki w tym tydniu potraciyli punkty ze Śląskiym i niy poradziyli za fest odskoczyć reszcie. Skuli tego od wiosny (tōż tzn. tak rychtyk od lutego) zacznie sie walka o mistrzostwo, o kiere durś do końca może grać nawet jakiś 5 ekip.

W tej grupie znojdymy tyż tych, kierzi po dłuższej przerwie majōm zaś smaka trocha se pomaszkecić w tytułach. Gynał 50 lot tymu Górnik zaczynoł rekordowo serio zdobywanio 5 mistrzostw krajowych z rzyndu. 15. korōna byłaby eleganckim geszynkiym na tako rocznica. Do tego jeszcze fōrt daleko, ale synki z Zabrzo zrobiyli ku tymu nastympny mały krok, jakim było klupniynci u sia groźnymu rywalowi z Gdańska.

Reszta ślōnskich ekip tyż spisywała sie w tym tydniu niynojgorzij. Styknie zejrzeć na wyniki...

Ekstraklasa

Ruch w kōńcu niy przegrywo
Łōńskigo roku takich tytułōw w gazetach za pierōna by my niy znodli. Teroski jednak dziwōmy sie na durś inkszy Ruch. Wydarzyniym jes zdobyci piyrszego punktu po sztyrech porażkach. Ni mogiymy jednak pedzieć, że synki z Chorzowa sōm radzi z takigo osiōngniyncio. Fusbaliści ci bez godki sōm bardzij ambitni. Niy wylynkały ich ostatni dobre statystyki Jagi i liczyli na 3 punkty u sia.

W piyrszych minutach spotkanio trocha bardzij ciśli goście. Tak rychtyk jednak piyrsze słowo noleżało do Niebieskich. W 16. minucie Filip Starzyński cyntruje z roga. Bal leci, w kierunku Piecha, ale tego wyprzedzo i trefio głowōm do siatki Grzyb. Nikierzi mōgliby pobamōncić, że rozchodzi sie o wychowanka Ruchu, beztōż przipōmnymy yno, że Wojciech Grzyb je już na szportowej pyndzyji. Autorym gola jes za to Grzyb Rafał, fusbalista Jagi. Tōż jes 1:0 po samobóji.

Hneda blisko wyrownanio bōł nojskutyczniejszy polski snajper, kiery jeszcze tyro po boiskach. Frankowski minōł już Peskovicia, ale wyciepało go na tak ostry kōnt, że było już po ptokach. Niebiescy niy pozwolajōm mu jeszcze dogōnić w klasyfikacji snajperōw Cieślika., beztōż pan Gerard może podziynkować swoim młodszym kamratōm klubowym.
W 30. minucie za to w eleganckij sytuacji znod sie Piech. Kadrowicz Fornalika, kiery tyroł w tym szpilu jak gupi, niy poradziōł jednak pokōnać tormana. Kej znodli sie sōm na sōm trefiōł gynał w niego.

Po przerwie Hajto wkludzo na boisko Smolarka, co za chwila okoże sie nojlepszōm decyzjom trynera Jagi w tym spotkaniu. W 68. minucie właśnie Ebi dostowo prostopadłe podani ,,miōd-malina" od Franka. Smolarek wyloz gynał w tympo, znod sie sōm na sōm i sieknōł praje tak jak w pamiyntnym szpilu z Portugaliōm na Stadiōnie Ślōnskim. Jes 1:1.

Tyn wynik już sie niy zmiyni, ale doprowdy mōgło być rozmańcie. Bliżyj 3 punktōw bōł Ruch. Na dyć Niebiescy bez ostatni 15 minut grali w przewodze po czerwōnej kartce do Bandrowskigo. Nasi wrazili nawet bal do siatki, ale skuli syndziowskigo ausdruka gola niy było. Nojbardzij nerwowym groczym po szpilu bōł beztōż Arek Piech, kiery chyba jeszcze długo bydzie gorszōł sie na syndziōw. Trza jednak prziznać, że synek mo recht. Spolōnego niy było. Panu syndzimu fankowymu chyba rychtyk zdałoby sie wybrać po nowe brele.

Yno rymis i aż rymis. Ruch dalij jes yno jedyn plac nad strefōm spadkowōm. Obejrzymy co klub wykōmbinuje bez zima. Mōmy nadziejo, że niy sprzadajōm zaś połowy składu, bo już godo sie o ewyntualnych transferach Piecha i Jankowskigo.

Piast przibliżo Bełchatów do I ligi
Dobrze jesiyń kōńczōm fusbaliści naszego ekstraklasowego byniaminka. Po prziwieziyniu trzech punktōw z Bełchatowa, Piastunki mogōm se już spokojnie dychnōnć. Za ich jesiynne wyniki i siódmy plac żodyn niy powiniyn ich specjalnie przezywać. Ni ma szału, ni ma gańby, Trza jechać dalij...

W poczōntkach szpilu niy zdało sie jednak, że tak dobrze to sie skōńczy. Wiyncyj do godki mieli gospodorze, kierzi chcieli za jednym szlagiym chcieli powiynkszyć swōj sześciopunktowy dorobek ligowy o 50%.

GKS-owi udało sie nawet otworzyć wynik szpilu w 20. minucie. Łukasz Madej, kiedyś wielko nadziejo polskigo fusbalu, pokozoł, że wiy jak sie kulo bal. To ōn po gryfnej akcji z Kamilym Wacławczykiym znoloz w szesnostku gości durś niywachowanego Buzały, kiery bez problymu wraziōł bal do siatki na 1:0.

Na szczynści Piast mioł Tōmasza Podgórskigo. Kapitan gości, jakby to pedzioł Piotr Kupicha: ,,pokozoł na co go stać, ale niy jedyn roz". Po roz piyrszy wykozoł sie w 39. minucie, kej kopoł do bala ustawiōnego ponad 20 metrōw przed bramkom Stachowiaka. Szlag z wolnego durś zaskoczōł tormana tak, że mōg yno odkludzić bal do siatki wzrokiym i dziwać sie jak na tablicy wynik zmiynio sie na 1:1.

Drugo połowa noleży już yno do fusbalistōw z Gliwic. Już 5 minut po przerwie Sikora wykludzo ich na 2:1. Tym razym brama wpado po kōntrze, zaczyntej przez Podgórskigo. Bal zagrany przez niego na lewe skrzidło trefio do Kędziory, kiery zaroski dogrywo do środka, a tamek akcjo szlagiym po zolu wykańczo już Adrian Sikora.
Wynik długu sie niy utrzimie. Za 10 minut goście zwiynkszōm swojo przewoga na 3:1, a główno rola zaś odegro ,,Kapitan Podgórski". Po wyciepaniu bala z autu Zbozień cyntruje, Sikora odgrywo, a do siatki trefio nasz bohatyr spotkanio.
Bełchatów do końca szpilu już sie niy spamiyntoł. Z ich groczy zapamiyntōmy już yno Grzegorza Barana, kiery zaliczōł czerwōno kartka za szpetny faul w 82 . minucie. Tabela prowda ci powiy. Piast na placu nr 7, Bełchatów ostatni.

Coroz bliżyj Legia
Tyn szpil bōł dō nos tak rychtyk nojważniejszy. Górnik przijmowoł u sia gości z Gdańska. Trza spōmnieć, że nasi mieli w sobota dodatkowo motywacjo, bo na dać nic tak niy cieszy jak porażka Legii. Okazji do zbliżynio sie na 5 punktōw do lidera synki z Zabrzo niy zawalili. Swojo okazjo wykorzystali tyż rezerwowi fusbaliści klubu. Zachara i Łuczak klupli po golu i pokozali, że ni majom płacōne yno za darymne grzoci ławy.

Z poczōntku warcij na bramka przeciwnika fechtli sie goście. Pora razy udało im sie tamek trocha zafyrlać, ale żodnego efektu z tego niy było. Górnik doł im chwila pogupnōnć, ale zaroski wziōn sie do roboty. W 14. minucie przi cyntrze z roga Magiery, dobry plac w szesnostku wywalczōł se Mateusz Zachara. 20-letni zmiynnik Milika z bliska, głowōm pokierowoł bal do siatki.
Kej czynś groczy myślała już jak w szatni siednōnć se nojbliżyj grzejnika i jak wartko dociś sie do szklonki z gorkim tyjym, kibice obejrzeli drugo bramka. Scynariusz akcji jes inkszy, ale aktorzy podobni. Zaś podowo Magiera i zaś szlag oddowo zmiynnik, tym razym zastympca Kwieka. Wojciech Łuczak cyluje tak, że Buchalik ni mo wiela do godki. W doliczonym czasie robi sie 2:0.

W drugij czynści szpilu co prowda bramek my niy widzieli, ale gra sie lekko rozfechtowała. Bardzij pilować musieli goście, kierzi w kōńcu przekludziyli pora groźnych okazji. Skorupskigo niy poradziyli pokōnać jednak ani Traore, ani Piotrowski. Po szlagu tego piyrszego bal o cyntymetry minōł bramka. Drugi za to bōł już bliżyj, bo sieknōł w lata. Wynik jednak sztyjc sie niy zmiynioł.

Zabrze mōgło klupnōnć nawet trzecigo gola. W samej kōńcōwce Nakoulma wyloz na dyć na sōm na sōm. Tym razym piyknōm paradom popisoł sie jednak Michał Buchalik.

Górnik zaliczo fest ważne punkty w szpilu z niybelejakim przeciwnikiym. Na ścigniynci Legii przidzie jeszcze czos na wiosna. Tera nasi mogōm z czystym sercym chwila dychnōnć, chyba, że już bierōm sie za warzyni moczek i szykowani makōwek na wilijo.

Grzegorz Buchalik
silesiansport.pl

CZYTAJ KONIECZNIE:
Blog Grzegorza Buchalika Ślonski fusbal CZYTAJ TUTAJ

*NiesamowityDreamliner w Pyrzowicach ZOBACZ ZDJĘCIA i WIDEO
*Zniewalający wystrój restauracji Kryształowa Magdy Gessler ZOBACZ ZDJĘCIA i WIDEO
*HC GKS Katowice od szatni ZOBACZ ZDJĘCIA TYLKO W DZ
*Ślązacyzazdroszczą Katalończykom autonomii: prawda czy fałsz? [CZYTAJ I SKOMENTUJ]