Buchalik: Ważne punkty Ruchu

    Buchalik: Ważne punkty Ruchu

    Ślonski fusbal

    Dziennik Zachodni

    Dziennik Zachodni

    W kōńcu w mediach chocioz na chwila zabłyśnie Ruch i niy bydzie to wcale Ruch posła Palikota. Tym razym fusbaliści z Chorzowa zaliczyli pewne zwyciynstwo i pokulali GKS w Bełchatowie 3:0. Dwa gole klupnōł Maciej Jankowski, jednego dopisze do swojigo fusbalowego CV Łukasz Janoszka.
    Bełchatōw już downo ni mo co kalkulować. Coby sie utrzimać musi na gwołt wygrywać szpil za szpilym, tym bardzij z tabelowymi sōmsiodami. Ruch ni ma zaś w tak fest dramatycznej sytuacji, ale żodyn w Chorzowie raczyj ni ma rod z postawy ich groczy w tym sezōnie. Coby chocioż trocha odbudować zaufani kibicōw ,,Niebiescy" ni mōgli drugi tydziyń z rzyndu przegrać z potyncjalnym spadkowiczym. Beztōż motto obu ekip na sobota to: ,,yno 3 punkty!".

    Poczōntek szpilu za pierōna niy zapowiadoł kōńcowego wyniku. Obie ekipy trocha postraszyły tormanōw, ale wiyncyj z gry mioł jednak Bełchatōw i to tyż ōni mōgli jako piyrsi sieknōnć gola. Mateusz Mak w eleganckij okazji trefiōł jednak gynał w młodego tormana Ruchu, Kamińskigo.

    Jak w fusbalu ważny jes cufal i wartki oriyntowani sie w sytuacji dowiedzielimy sie po 33. minucie. Przody z wysokości siōdmego metra na bramka Ruchu kopie Dawid Nowak, ale trefio yno w słupek. Bal za chwila w rynkach mo już Kamiński i dalekim wykopym uruchamio wartko kōntra gości. Dziwōmy sie na gibko wymiana bala miyndzy Starzyńskim, a Jankowskim. Zaroski tyż właśnie tyn drugi wykorzysto lekki przidrzymani obrōny i pewnym szlagiym wykludzi Ruch na 1:0.

    Gospodorze fest chcieli wyrownać jeszcze przed przerwōm, ale niy było im to dane, chocioż wiela niy brakowało. Po jednej z ich akcji defynsywa ,,Niebieskich" dała sie trocha zrobić za błozna i bal nawet znod sie w ich siatce. Na szczynści syndziowie dali pozōr, że Mak bōł na spolōnym. Hneda fanōm Ruchu zaś zrobiyło sie ciepło. Daleko z bramki wyloz Kamiński, ale piyrszy przi balu bōł Nowak, kierego szlag jednak minimalnie minōł słupek.

    Drugi kōnsek spotkanio elegancko zaczōn sie do Ruchu. Już w 47. minucie Jankowski wykorzystoł miszōng w szesnostce po cyntrze z roga i zdobōł swojigo drugigo gola w tym szpilu. Po tym szlagu gospodorze niy poradziyli już sie spamiyntać.
    Bramkowy szlag nr 3 przipado na 56. minuta. Po zagraniu rynkōm Grzeszczyka arbiter pokozuje na wopno. Kopniynci Panki z elwra jeszcze jes wychycōne, ale przi dobitce Janoszki torman ni mo juz nic do godki.

    Jes jeszcze ponad pōł godziny do kōńca, ale tak rychtyk nic ciekawego juz sie samek niy stanie. Ruch dokludzi do kōńca pewne zwyciynstwo i chocioż na chwila poprawi humory swoim kibicōm.

    Wynik szpilu wszyjskigo mono nōm niy godo, bo kieby gospodorze wykorzystali swoji okazje mōgłoby być durś inaczyj. Faktym jednak jes, że Ruch zgarnōł ważne punkty, a w Bełchatowie hneda bydōm chyba mōgli zaczōnć sie przizwyczajać, że na nojwyższym poziōmie bydōm u sia mōgli podziwiać yno siatkorzy. Ich ekipa fusbalowo jes coroz bliżyj furgniyncio do ekstraklasowego ,,antryju".

    GKS Bełchatów - Ruch Chorzów 0:3 (0:1)
    Bramy: Maciej Jankowski (33. min.), Maciej Jankowski (47. min.), Łukasz Janoszka (56. min.)
    Bełchatōw: Emilijus Zubas - Raul Gonzalez, Seweryn Michalski, Maciej Wilusz, Rafał Kosznik  - Mateusz Mak (70. Michał Mak), Łukasz Grzeszczyk (59. Kamil Poźniak), Grzegorz Baran, Kamil Wacławczyk, Łukasz Madej - Dawid Nowak (46. Bartosz Żurek)
Ruch: Krzysztof Kamiński - Żeljko Djokic, Marek Szyndrowski, Piotr Stawarczyk, Igor Lewczuk - Jakub Smektała (85. Kamil Włodyka), Łukasz Tymiński, Mindaugas Panka, Filip Starzyński (66. Marcin Malinowski), Łukasz Janoszka - Maciej Jankowski (80. Grzegorz Kuświk)





    *Strajk generalny 26 marca w woj. śląskim
    *Bandycki napad na sklep w Mysłowicach ZOBACZ WIDEO
    *ZOBACZ luksusowe samochody prezydentów miast. Po co im to? ZOBACZ ZDJĘCIA
    *Serial Anna German [STRESZCZENIA ODCINKÓW]

    Codziennie rano najświeższe informacje z woj. śląskiego prosto na Twoją skrzynkę e-mail. Zapisz się do newslettera

    Czytaj także

      Komentarze (2)

      Dodajesz komentarz jako: Gość

      Dodając komentarz, akceptujesz regulamin forum

      Liczba znaków do wpisania:

      zaloguj się

      Autor komentarza nie dodał zdjęcia
      tak sie godo?

      svatopluk (gość)

      Zgłoś naruszenie treści / 9 / 6

      fusbaliści? a niy fusbalorze?


      Autor komentarza nie dodał zdjęcia
      Od autora

      G. Buchalik (gość)

      Zgłoś naruszenie treści / 9 / 7

      Chyba godo sie rozmańcie, ale mono rychtyk lepsze jes ,,fusbalorze"...

      Najnowsze wiadomości

      Zobacz więcej

      Najczęściej czytane

      DZ poleca

      Wideo

      Gry On Line - Zagraj Reklama