Buchalik: Górnik-Lech. Elwrowy dramat Górnika

Spotkani w Zabrzu to bez godki szlagier kolejki. Szpil tyn bōł pierōnym ważny do układu tabeli, ale tyż do kōńcowej walki o ,,majstra". Legia tym razym wymynczyła 3 punkty z Podbeskidziym, beztōż było zaś co odrabiać.

Rymis uciechy ni mioł dać nikōmu, co było widać od piyrszego gwizdka. Tympo gry było raczyj ponadprzeciyntne jak na polsko Ekstraklasa. Nasztelowany na ataki pozycyjne Górnik wyraźnie przewożoł w posiadaniu bala, ale to kōntry Lecha zdowały sie być groźniejsze. Kieby obrōna gospodorzy pora razy niy spacyfikowała skutecznie Ślusarskigo, czy Hamalainena, mōgłoby być rychtyk groźnie.

,,Setōw" pod jednōm ani po drugōm bramkōm ciynżko było sie jednak doszukać. Górnik mōg mieć dobro okazjo w 21. minucie. Łuczak chyba niypotrzebnie zdecydowoł sie na szlag, kierym niy napochoł wiela, chocioż bramkorza trocha musioł wylynkać. Mono kieby napastnik Górnika zagroł na prawo, kaj na durś wolny plac wlatywoł Olkowski, efekt bōłby inkszy. Do przerwy jednak 0:0.

Poczōntek drugij połowy doł nōm znać, że bydzie sie dzioło. Nojprzōd dobro okazjo mioł Adam Danch. Obrōńca Górnika próbowoł zaskoczyć wysuniyntego fōrt z bramk Buricia. Bal jednak niy pofurgnōł ,,w światło".

Hneda oglōndōm seria atakōw Lecha, kierych nojwiynkszym bohatyrym okozuje sie Skorupski. Torman z Zabrzo wygrywo pojedynki jedyn na jedyn przody z Hamalainenym, a zaroski potym z Teodorczykiym. Skorupski bez pora minut co chwila musioł ratować Górnikōw z ciynżkich sytuacji.

Syndzia niy umioł sie już chyba dziwać na niyudolność ofynsywy Lecha i zdecydowoł sie ułatwić im zadani. W 62. minucie pokozuje na wopno po tym jak ponoć Gancarczyk zagroł rynkōm. Elwra wykorzystuje Hubert Wołąkiewicz i mōmy 0:1. Kibicōm Lecha na myśl o arbitrze Pawle Raczkowskim przichodzōm tera chyba yno słowa znanego polskigo poety-skoczka Piotra Ż.: ,,No trzeba mu tą flachę postawić".

Górnik próbuje odpedzieć, ale brakuje żōndła, kierym szłoby rywala bajsnōnć. Niy pōmogo wkludzyni Nakoulmy, ani Jelenia. Elegancko okazjo na wyrownani pojawio sie jednak w 90. minucie. W ,,szesnostce" Lecha obalo sie Bartosz Iwan i arbiter po roz drugi koże ustawić bal na jedynostym metrze. Wyrownać mioł tyn, na kierego wszyjscy czekali. Nakoulma, kiery wrociōł nazot na boisko po kōntuzji, niy bydzie jednak spōminoł tego szpilu dobrze. Po jego szlagu z elwra bal furgnie w trybuny i jes już po ptokach.

Fest szkoda tak szpetnie stracōnych punktōw. Dwa przegrane szpile z rzyndu to durś niy w stylu Górnika z tego sezōnu. Zabrze skōńczy 18. kolejka dopiyro na czwortym placu. Teroski kibicōm uciecha może dać yno wklupani Legii w piōntek. Tego szpilu za pierōna niy wolno przegrać.

Górnik Zabrze - Lech Poznań 0:1 (0:0)
Bramka: Hubert Wołąkiewicz (62. min. - elwer)

Górnik: Łukasz Skorupski - Paweł Olkowski, Adam Danch, Ołeksandr Szeweluchin, Seweryn Gancarczyk - Grzegorz Bonin (73. min. - Prejuce Nakoulma), Aleksander Kwiek (72. min. - Krzysztof Mączyński), Bartosz Iwan, Wojciech Łuczak, Sergei Mosnikov - Tomasz Zahorski (73. min. - Ireneusz Jeleń)

Lech: Jasmin Burić - Kebba Ceesay, Marcin Kamiński, Ivan Djurdjevic, Hubert Wołąkiewicz - Karol Linetty (83. min. - Gergo Lovrencsics), Łukasz Trałka, Rafał Murawski, Kasper Hamalainen, Aleksander Tonew (86. min. - Mateusz Możdżeń) - Bartosz Ślusarski (46. min. - Łukasz Teodorczyk)

Grzegorz Buchalik, student z Żor, uwielbia grać w piłkę i relacjonuje po śląsku mecze ekstraklasy. Ślōnski fusbal ma udowadniać, że język śląski to nie tylko żarty, co nie znaczy, że żartów musimy usilnie unikać. Ślōnski fusbal ma przede wszystkim promować śląski język i sport. Teksty adresowane są nie tylko do Ślązaków, dla których godka jest językiem ojczystym, wyniesionym z domu. Grzegorz Buchalik pisze alfabetem łacińskim z tym, że dodaje jedną literę-samogłoskę, zapisywaną jako: ō (jak np. w wyrazach kōnsek", czy pozōr).

*Ranking szkół nauki jazdy 2013
*Restauracja Rączka gotuje otwarta ZOBACZ ZDJĘCIA
*Granica polsko-niemiecka 1922 na Górnym Śląsku [SENSACYJNE ZDJĘCIA]
*Podziemny dworzec autobusowy w Katowicach działa! [ZDJĘCIA]